ماليش غيرك

معروض كلى عليك
عالم كل الخفايا
مكشوفه بين إديك
ذراتى و الخلايا
عبدك و ابن ام عبدك
ظالم نفسى و سوايا
غرقان فى بحور ذنوبى
متكبل بالخطايا
قابض على خشبه دايبه
متشعبط فى الشظايا
باضرب رجلى فى هوه
و قرار مالهوش نهايه
و اضرع إليك يا ربى
ترحم ذلى و أسايا
تغفر يا رب ذنبى
و تجود لى بالهدايه
و تنور ليل دروبى
و تسعدنى ف شقايا
عاصى و عيان و تايه
و انت طبى و دوايا
ماليش فى الكون ده غيرك
و انت رب البرايا
لاجئ على باب جنابك
دمعى فرشى و غطايا
ندمان على كل لحظه
ضاعت شهوه و غوايه
فى احبال حبك يا ربى
عقدة حسن النوايا
مربوط شريانى فيها
لو فك تسيل دمايا