توب الفرح

#محمد_رزق
بتمر الساعات
شرايط ذكريات
و فرحه ف كوم آهات
و انا بغزل على نول غربتى توبك
و نفسى عريس يكون يا مصر من توبك
يكون عاشقك و محبوبك
يزيح عنك سواد الليل
و يمحى شقاك و كروبك
و يشفيكى بشربة نيل
ترجع بسمتك تانى
و تغسل عنى أحزانى
تشيل من صدرى كام سكينه
غزَّانى
تطهر أرضى من سارق و من قاتل
و من خاين
و من زانى
و اردد آيه هزانى
و بطل نوحى فى المواويل
يا مصر باحب أقول إسمك
و املى عنيه من رسمك
تحس الروح دفا جسمك
يطلع بردى فى الزنازين
أنا وردى زرعته لمين
و روِّينه بدمع حزين
كتبت قصيده
شعر رزين
أغنيه ليكى ف الكوشه
لقيتك زيى معكوشه
بدل ما تلبسى غويشه
تشخلل فى الإيدين و تزين
لقيت الكلب حط كلابش
لابس كاب عليه نسرين
و داس الورد و النسرين
و جات ساعة الخلاص يا مصر
من بعد الهوان و الطين
و هنبدل بذلك نصر
يا رب ارزقنا بالتمكين