ملايه لف
فى سرير أبيض و ملايه
و انا كلى شعور و حواس
و دكاتره كتير حواليا
شايلين سكاكين و اكياس
بيقطعوا منى و عبوا
م السره لحد الراس
و انا متكتف مش قادر
بازعق و لا سمعوا الناس
فضونى من جوه ما سابوا
غير فارغه بدون إحساس
فى الآخر كتبوا شهادتى
شطبونى من الكراس
و خادونى بره رمونى
ملفوف زى الفنطاس
و بسرعه الناس ودونى
على جامع ميت عساس
صلوا بسربعه و سابونى
فى القبر وحيد محتاس
حتى اصحابى ما استنوا
فين يا عصام الإخلاص
مش كنت و هانى اخواتى
بيقولوا كوزين فى لباس
فيها إيه لو تفضلوا حبه
يا ما داب فى طريقنا مداس
أصعب لحظه اتخليتوا
اشربوا من نفس الكاس
مش طالب غير دعواتكم
أنا وضعى هنا حساس
محتاج اتونس بيكم
ما تزوروا زى الناس
التعليقات على الموضوع