يا بواحث فلفلوا

ازاى البحث يا ابنى و الطلبه بالآلاف

مايجيش بينهم تشابه و ييجى الاختلاف

اقول لك يا حبيبى بس اعمل شير و لاف

البحث زى بصمه فى المضمون و الغلاف

مش معقول المغمس هتقارنه بأكل حاف

و صوابع الست ناعمه و كمان دايما نحاف

غير صابع الصنايعى خشن زى الشقاف

طب و التقييم يا باشا انا قلبى طب خاف

بيقولوا ع المنصه أساتذه كبار نضاف

هيطلعوا المفعص على سنيننا العجاف

و هيجزروا اللى غاشش و مكلفت فى اللحاف

و يسقطوه يا عينى و الله احنا ضعاف

البحث جاب أجلنا و الكل داق و شاف

بقى لى شهر كامل و ريقى حبر جاف

متشعطط ع السيابر وكعبى عليها طاف

ده يقول غير اللى قال ده و حيرنا الخلاف

و طروقه خوتنا بين صاد و سين و كاف

و كل يوم بحاجه بصراحه ناس خفاف

اتقل يا عم و ارسى و اشرب لك كاس خشاف

إنجز خلينا نخلص و نقطع الاعتكاف

عاوزين نقوم لزقنا فى كرسى الإعتراف