ذكريات
ماليش غيرك يا وحده صديق
و اشيل كم ذكرى من أيامى و نسافر
لهو بعيد مالوش قرار
و الاقى نفسى فى طفولتى
و بيت بالنى
و كل القريه شارعنا
و شارع صاحبى و الغيطان
شوارع كات تحب اللف
و الدوران
و حارات سد لا تودى
و لا بتجيب
و لما حد يدخلها تلومه العين
و يرجع دوغرى م الكسفه
ما يسأل حد
و جرن القمح و الدوار
و عشة عمى إسماعيل
بيحضنها الكافور م الشمس
و تتسحب لها القمره
و يتبادلوا الهزار و الهمس
و ابص ف وش صاحبى عصام
و أضحك ضحكه مجنونه
فروع صفصاف على اكتافه
فى سحر الليل و تنهيده
لمحت ف وشه جنيه
شعورها السمرا مفروده
و قلبى اتخض
و لما الفجر بيشقشق
و يتوضى الوجود بالنور
اشوف فى العش عصفوره
بتتدلع على عصفور
و يطرف عينها بجناحه و يتبسم
و هى تقول له يا مغرور
و ضى الشمس يلفحنا
نشنك عينا و نروح
نجيب الجبنه م البلاص
و من خالتى البصل و العيش
طويل زى جناحات النسر
يا خاله هاتى عيش مسلوق
و لف اللقمه ع الجعضيض
و بوس بيها شفايف الجبنه غرقانه
ف شطيطه و مش
و وسع بقك المفتوح
كإنه الدش
و كل و القله بتزغرط
فى إيد عطشان
تلف على الحبايب لف
ما هيه حته م الحاره
و حارتى تعشق الدوران
#محمد_رزق
التعليقات على الموضوع