كنا احداشر

كنا احداشر فرد ف بيت
أمى و ابويا و تمن اخوات
أخين غيرى و ست بنات
غير توأم بنتين و مات
كنا الفرخه بتـأكلنا
ولا - دلوقتى - عشر فرخات
كنا سريرين بيلمونا
و كنبه و شلته و كله يبات
و اتفرقنا و فرغ بيتنا
و اتبعترنا فى محافظات
م الشرقيه للغربيه
من مطروح و لحد للمنيا
و بقى لقانا بمناسبات
فاكر لسه بنلعب " بلتك"
فى القمرايه مع الشنبات
و اما لعبنا التعلب فات
يا ما مشينا فى العصريه
ع الزراعيه ساعات و ساعات
و شويت دره فى أراضى صحابى
و حلينا توت و بلح أمهات
و لا الجبنه قديمه بدودها
من أيام الخواجايات
شفت ام امى و جدة أمى
و عشت معاها كمان سنوات
النيل اشتكى من شقاوتنا
و الاجران كان ليها آهات
صدنا العصافير يا ما بالنبله
و اتفشخرنا باليمامات
و حكينا و سمعنا حكاوى
من أيام الأهرامات
و اتغدينا سوا ع الاسطح
ألفنا فى الأكل حاجات
تلتين عمرى ما كانش ف بيتنا
كنت بالف سبع لفات
أفطر مع عمتى و اتغدى
مع خالتى و عمى بركات
أيام كانت و لا تتعوض
أجمل عمرنا ماضى و فات
#محمد_رزق