قهرستان

كان يا ما كان عربجى
عايش فى (قهرستان)
سوق التلات اشترى
منه حمار كحيان
عمره ما داق العلف
و عاش سنين حرمان
العربجى دلعه
فضل عليه سهران
و جاع عشان يعلفه
و كان حمار سعران
و اشتد عود الحمار
و طلع له ألف لسان
و بدأ يرفس ف صاحبه
عشان حمير الجيران
و ساق عليه الهبل
و ساق عليه الجنان
صرف عليه اللى حيلته
و اتذل لما استدان
نصحوه ولاد البلد‎ ‎
يقف ف وش الشطان
رد المغفل عليهم
بكل رقه و حنان
حمارى راشق فى قلبى
و لسه عاوز كمان