الشتا و البطانيه

الشتا و البطانيه
قصة الحب اللى كان
و المراتب شاهده تثبت
مين ف عز السقعه خان ؟
لسه فاكر يوم ما كنا
ف البيوت نحرق قوالح
نغسل الوش و إيديدنا
بالدفا و البرد فاتح
فى القلوب كل البيبان
و السقوف عماله تنقع
و الطشوت تلقف و تبلع
و الصوانى ع السراير
و الملايه اياك تبان
بره ابويه بسيخ حديد
يرشقه فى الطينه تشرب
ميه تشتى من جديد
و احنا نجرى عشان نطبش
فوق وشوش الناس نطرطش
طين و نضحك كان زمان
فين مرحنا و فين فرحنا ؟
فين طرح أمى القديمه ؟
و الحيا كان ترجمان
كنا أطفال و النهارده
لسه أطفال و اللى شاخوا
الشوارع و الغيطان
الوشوش ليه كالحه مالحه
و الهموم فى ارواحنا سارحه
تدبح الخير و الأمان
و الحوارى ليه بتنسى
بعد قله السعد فيها
جات إزازه و برطمان
مشربيتنا العتيقه
اللى راحت فى الحريقه
قفلوها قال بتجرح
و اشتكوا منها الجيران
كل واحد صار جزيره
و الفطير اتسمى بيتزا
و الحكاوى و الغناوى
أصبحت مالهاش لسان‎